भुटानी शरणार्थी शिविरहरूमा दशैंको चहलपहल कस्तो हुन्छ भन्ने कौतुहलता मेटाउन पत्रकार युवराज विवस र म आज त्यता गएका थियौं । शिविर नपुग्दै थाहा भयो, शिविरमा दशैंको चहलपहल राम्रै थियो । शिविर नजिकका बजारमा मानिसहरूको भिडभाड धेरै नै थियो ।म आजभन्दा अगाडि धेरै पटक त्यहाँ पुगेको थिएँ तर त्यस्तो चहलपहल कहिल्यै देखेको थिइनँ । शिविर आसपासका बजारको त के कुरा, भित्र पनि ठाउँठाउँमा त्यत्तिकै भिडभाड थियो । शिविरका मुख्य बाटोका साथसाथै भित्री बाटाहरूमा पनि चहलपहल निकै थियो ।

शिबिरका चोकचोकमा हाउजी खेल्ने खेलाउनेहरूको प्रतिष्पर्धा थियो । शिविर पुगेर पनि बिशेष रिपोर्टिङ हुन सकेन किनकी मोवायलको समस्याले गर्दा भेट्न खोजिएको साथीसँग सम्पर्क हुन सकेन । तर पनि हामीले त्यहाँका केही फोटोहरू भने खिचेर ल्याएका छौं । दशैंकै अवसरमा साथी गोपाल झापालीले तयार गरेको एउटा समाचार यसै साथमा

झापा र मोरङमा रहेका भुटानी शरणार्थी कलाकार समूहले साङ्गीतिक भेटघाटसहित दसैँ मनाइरहेका छन् ।
काठमाडौँबाट आएका बाँसुरीबादक दीपक राईको प्रमुख आतिथ्यमा दसैँसम्बन्धी धुन बजाएर मनोरञ्जन गरिएको समूहका सदस्य किरण गुरुङले बताउनुभयो ।
समूहले विभिन्न सङ्गीत तथा नृत्यसमेत प्रस्तुत गरी शरणार्थीलाई खुसियाली प्रदान गरिएको बताइएको छ ।
पुनर्वासका कारण यस वर्ष शरणार्थीको दसैँमा रमाइलो हुन सकेको छैन । शरणार्थीका आधा परिवार तेस्रो मुलुक गइसकेकाले दसैं खल्लो भएको उनीहरू बताउँछन् ।
विगतका वर्षहरूमा धेरै शरणार्थीहरू एकदेखि अर्को शिविर आउने जानेको घुइँचो हुने गरेको क्याम्प सचिव गणपति अधिकारीले स्मरण गर्नुभयो ।
सन् २००८ बाट सुरु भएको पुनर्वास प्रक्रियाले हालसम्म ३६ हजार भन्दा बढी शरणार्थी विभिन्न ८ देशमा पुनर्वास भइसकेका छन् ।

From: Tito Piro Mitho